అయోధ్యలో అరుదైన దృశ్యం.. రాముడి చిత్రాలు పంచిన ఇక్బాల్ అన్సారీ

అయోధ్యలో మత సామరస్యానికి ప్రతీకగా నిలిచే ఒక అపురూప దృశ్యం ఆవిష్కృతమైంది. శ్రీరామ నవమి పర్వదినం సందర్భంగా బాబ్రీ మసీదు కేసులో ఒకప్పటి పిటిషనర్ అయిన ఇక్బాల్ అన్సారీ, భగవాన్ శ్రీరాముడి చిత్రపటాలను భక్తులకు, భద్రతా సిబ్బందికి కానుకగా పంచిపెట్టి తన భక్తిని చాటుకున్నారు. ఈ చర్య అయోధ్యలో నెలకొన్న ఐక్యతా భావనకు నిదర్శనంగా నిలిచింది.

ఇవాళ‌ జరిగిన శ్రీరామ నవమి వేడుకల్లో ఆయన ఉత్సాహంగా పాల్గొన్నారు. అయోధ్యకు వచ్చిన భక్తులతో పాటు అక్కడ విధుల్లో ఉన్న సిబ్బందికి రామ్ లల్లా చిత్రాలను అందించి తన సంతోషాన్ని పంచుకున్నారు. ఈ సందర్భంగా ఆయన ఐఏఎన్ఎస్‌ వార్తా సంస్థతో మాట్లాడుతూ.. "ఇది అయోధ్య విశ్వాసం. ఇది దేవుడి ప్రసాదం. నేను దీన్ని భద్రతా సిబ్బందితో సహా ఇక్కడికి వచ్చే ప్రతి ఒక్కరికీ పంచుతాను. ప్రజలకు దీన్ని ఇవ్వగలగడం నా అదృష్టం. ఇది దేవుడిపై నాకున్న భక్తి" అని అన్నారు.

శ్రీరామ నవమిని ఒక చారిత్రాత్మక దినంగా ఆయన అభివర్ణించారు. "శ్రీరాముడిపై ప్రజలకు ఉన్న అచంచల విశ్వాసంతోనే వారు అయోధ్యకు వస్తారు. ప్రసాదం రూపంలో ఈ రాముడి చిత్రాన్ని తీసుకువెళ‌తారు" అని తెలిపారు. అయోధ్య నగరం ప్రాముఖ్యతను కూడా ఇక్బాల్ అన్సారీ ప్రత్యేకంగా ప్రస్తావిస్తూ.. "అయోధ్య ఒక పవిత్ర స్థలం. ఇది శ్రీరాముడి నగరం. దేవుళ్లు, దేవతల పట్టణం. అయోధ్య లాంటి ప్రదేశం ప్రపంచంలో మరెక్కడా లేదు. ఎందుకంటే సాక్షాత్తూ భగవంతుడే ఇక్కడ నివసిస్తున్నాడు" అని పేర్కొన్నారు.

ఇదే రోజు రామ మందిరంలో జరిగిన 'సూర్య తిలకం' క్రతువుపై ఆయన హర్షం వ్యక్తం చేశారు. ప్రతి శ్రీరామ నవమి రోజున సూర్యకిరణాలు నేరుగా రామ్ లల్లా విగ్రహం నుదుటిపై ప్రసరించేలా చేసే ఈ ఘట్టం దేశ ప్రజలందరికీ ఎంతో సంతోషాన్నిచ్చే విషయమని అన్నారు. "బయటి నుంచి వచ్చిన భక్తులందరూ ఈ రోజు స్వామివారి దర్శనం చేసుకోగలుగుతున్నందుకు ఆనందంగా ఉన్నారు" అని తెలిపారు. ఈ పవిత్ర ఘట్టాన్ని ప్రధాని నరేంద్ర మోదీ కూడా స్క్రీన్‌పై వీక్షించి, దేశ శ్రేయస్సు కోసం ప్రార్థనలు చేయడం గమనార్హం.